Përgjysmohen çmimet e shtëpive në bregdet

03.02.2014

Kriza dhe ndërtimi pa kriter kanë ulur ndjeshëm shitjet dhe çmimet në disa zona bregdetare të vendit. Zona më “e dëmtuar” është Durrësi, ku çmimet përllogariten të kenë rënë deri në 50% në raport me fillimin e parakrizës.

Agjentët këshillojnë se për këdo që kërkon një shtëpi të dytë, ky është momenti ideal për të “kapur” ofertat

Vetëm dy vjet më parë, një apartament në pallatin më të madh prej 25 katesh në bregdetin e Golemit, me pamje nga deti, kushtonte 950-1000 euro/m2. Sot, përveçse pjesa më e madhe e apartamenteve në këtë pallat të stërmadh që ka prishur gjithë bukurinë e bregdetit të Golemit, ka mbetur e pashitur, edhe ata që kanë blerë kërkojnë t’i “heqin qafe”. Nga një telefonatë në një prej numrave të tabelave të shumta me shënimin “Shitet” mësojmë se pa bërë Pazar, një apartament përballë detit të mobiluar në pallatin në fjalë mund ta marrësh me 550 euro m2. Dhe sërish nuk arrin të shitet.

…Tashmë koha kur “shtëpia e dytë” u shndërrua në një trend dhe shumë konsumatorë blenë apartamente në bregdetin shqiptar, duket e largët. Megjithëse tashmë sezoni turistik ka nisur, plazhet janë mbushur me pushues vendas dhe të huaj, në shumë godina të larta apartamentesh qëndrojnë ende varur tabelat “shiten apartamente dhe dyqane”.

Siç kanë konfirmuar edhe drejtuesit e Shoqatës së Ndërtuesve, në vend janë mbi 4,000 apartamente të pashitura dhe pjesa më e madhe e tyre janë në bregdet.

Rënia e shitjeve konfirmohet që nga Veriu deri në Jug të vendit.

Sipas operatorëve në zonën bregdetare në Lezhë, numërohet një numër tepër i madh i apartamenteve të pashitura dhe shumë pallate janë bosh.

Edhe më “pesimiste” është panorama në qytetin e Durrësit, që pas viteve ‘90 ka pësuar edhe “agresionin” më të madh të ndërtimeve pa kriter në zonën e plazhit.

Situata negative e shitjeve nuk shfaq asnjë përmirësim edhe këtë vit. Agjentë imobilarë në zonat bregdetare të vendit konfirmojnë për “Monitor” se kërkesa është e ulët, ndërkohë që çmimet kanë pësuar rënie të lehtë.

Ulja e çmimeve mund të shfrytëzohet nga blerës që kërkojnë të investojnë në një shtëpi të dytë, pasi sipas agjentëve, tregu pritet të ketë përmirësim në vitet në vazhdim.

“Çmimet nuk janë asnjëherë ato që afishohen. Ka gjithnjë ulje dhe vihet re shtim shumë i madh i ofertave”, thonë operatorët.

Prandaj blerësit mund të përfitojnë duke blerë apartamente me çmime që arrijnë deri nën kosto.

Rënia e kërkesës dhe frenimi i blerjeve lidhet edhe në zonat bregdetare me dy fenomene: rënia e dërgesave të emigrantëve, që kanë qenë edhe blerësit më potencialë të këtyre apartamenteve, frenimi i kredive bankare, por edhe ulja e konsumit nga shumë individë, sidomos ata që deri dje shpenzonin për shtëpi të dyta.

Shkak, përveç bumit të ndërtimeve janë dhe infrastruktura jo e mirë që rrethon blloqet e banimit në zonat bregdetare, hapësirat e parespektuara, mungesa e ujit të pijshëm, si dhe në disa raste dhe lidhjet e parregullta me energji për shumë pallate.

Në një kohë kur turizmi shqiptar lë ende shumë për të dëshiruar, edhe fluksi i blerjeve të apartamenteve në zonat turistike do të mbetet i limituar. Sipas operatorëve turistikë, mungesa e rezorteve turistike dhe infrastrukturës, numri jo i madh i shtretërve në hotelet ekzistuese, bën që shumë operatorë rajonalë të fuqishëm në sektorin e turizmit, të mos e përfshijnë vendin tonë në destinacionet e tyre. Si rrjedhojë edhe numri i turistëve të huaj që vijnë në Shqipëri është ende shumë i vogël.

 

Harta e zonave

Po si ndahet harta e çmimeve dhe e shitjeve sipas zonave bregdetare të vendit. “Monitor” ka mbledhur një ecuri të detajuar të real-estate sipas qyteteve, bazuar në të dhënat e disa agjencive imobilare që operojnë atje.

 

DURRËSI

Çmimi minimal-400 euro/m²

Çmimi maksimal-800 euro/m²

Zona me çmime më të ulëta: Shkëmbi i Kavajës

Zona me çmime më të larta: Golem-Qerret

 

Çmimet bien deri në 50%

Agjentët imobilarë në qytetin e Durrësit kanë konfirmuar se shitblerjet e apartamenteve në zonën e Plazhit, të mbipopulluar me pallate banimi, janë thuajse inekzistente.

Shkaku kryesor është mbingopja e tregut me ndërtime, sidomos në zonat bregdetare. Si paradoks, në këtë qytet vijojnë ndërtimet, ndonëse ritmet janë shumë herë më të ulëta.

Ervis Halili, agjent imobilar i “Century 21 Enternal”, i cili po merret me shitjen e disa pronave në Durrës, thotë se mbingopja e ndërtimeve që ka pushtuar bregdetin, ka bërë që oferta të jetë shumë më e madhe se kërkesa. Në kushtet kur apartamenti në bregdet nuk ofron relaks, qetësi, por një “grumbull” pallatesh rreth e rrotull, dhe një plazh të papastër për të kaluar pushimet verore, dhe me muzikën që nuk pushon deri në orët e para të mëngjesit, blerësit po i largohen qytetit më të madh bregdetar.

“Durrësi nuk është më trendi i shtëpive të dyta. Vihet re se ka një kërkesë shumë të ulët për të blerë shtëpi të dyta në këtë zonë dhe nga ana tjetër, një ofertë e madhe që pret”, thotë Ervis Halili.

Sipas tij, kjo po çon në rënien e vazhdueshme të çmimeve dhe shtimin e ndjeshëm të ofertave në treg. “Në raport me disa vite më parë, çmimet janë thuajse përgjysmuar”, thotë z. Halili. Kjo rënie vlen më shumë për çmimet maksimale, që sot nuk janë më të larta se 800 euro/m², ndërsa dy-tre vite më parë ato arrinin deri në 1200 euro/m².

Një apartament sot në Durrës mund të blihet edhe me 400 euro/m², kryesisht në vijën e tretë të plazhit, duke nisur që nga zona pranë Urës së Dajlanit për të vazhduar me Shkëmbin e Kavajës.

Minimumi i çmimeve këtu është 400 euro/m², ndërsa maksimumi mund të arrijë në 700-800 euro/m². Në zonën e Shkëmbit të Kavajës, çmimi mesatar sot është 500 euro/m². Në zonën e Golemit deri në Qerret, çmimet luhaten 450-700 euro/m², pasi fluksi i ndërtimeve atje ka qenë pak më i ulët se në zonat e tjera.

Në tregun e apartamenteve në plazh, rol shumë negativ luajnë emigrantët, të cilët gjithnjë e më shumë nuk po blejnë më në vend. Nëse më parë, mjaft emigrantë blinin një shtëpi për plazh qoftë për periudhën e pushimeve apo për të afërmit e tyre, prej më se dy-tre vitesh, pesha e tyre ka rënë ndjeshëm.

Shitjet kanë qenë shumë të pakta, megjithëse numri i apartamenteve që dalin në shitje sa vjen e rritet. Shtetasit kosovarë kanë pasur interes, por shumë pak prej tyre arrijnë që të finalizojnë një blerje apartamenti.

 

Zona të reja

Tashmë blerësit po i largohen plazhit “tradicional” të Durrësit dhe interesi është spostuar në zona të reja. Një nga më të preferuarat është Gjiri i Lalëzit, ku plazhi është i virgjër dhe ato ndërtime që janë realizuar, janë me plan dhe kanë një organizim të mirë.

“Njerëzit po interesohen për Gjirin e Lalëzit, i cili nuk është prekur nga ndërtimet e shumta dhe ka një plazh shumë të mirë”, thotë Ervis Halili.

Këtu kryesisht janë ngritur rezorte luksoze nga kompani të fuqishme vendase dhe të huaja, të cilat operojnë me çmime më të larta. Çmimet e apartamenteve brenda rezorteve luhaten nga 900-1100 euro/m².

Një tjetër zonë e re në Durrës, e cila shtrihet brenda qytetit, por ka gjithashtu akses të shpejtë në plazh, është ajo e Currilave. Edhe këtu janë ndërtuar disa godina apartamentesh të larta, deri në 10 kate. Sipas agjentëve, kjo zonë operon me çmime mesatare 600-700 euro/m² dhe konsiderohet si një zonë e mirë për të blerë një apartament, qoftë edhe për ta shfrytëzuar si një shtëpi të dytë.

 

VLORA

Çmimi minimal – 500 euro/m²

Çmimi maksimal – 1000 euro/m²

Zona me çmime më të ulëta: Skela, Orikumi

Zona me çmime më të larta: Radhima

 

Shitjet më optimiste

Më optimiste shfaqet situata në Jug të vendit. Në qytetin e Vlorës, është shënuar një vit i vështirë, por megjithatë, në raport me Durrësin, situata është më pozitive.

Drejtuesi i agjencisë imobilare, “Century 21 Danushi”, thotë për “Monitor” se viti 2013 është i vështirë në krahasim me vitet e mëparshme.

“Ka rënie të kërkesës në raport me një vit më parë dhe sipas analizës tonë, më së shumti ka ndikuar edhe situata zgjedhore. Në Shqipëri për çdo qytet që ka lidhje me turizmin, zhvillimi i zgjedhjeve në sezon veror është problematik, pasi frenon ardhjen e turistëve dhe si pasojë ul edhe numrin e blerësve potencialë të pronave në këto zona”, thotë drejtuesi i agjencisë, Akil Danushi.

Sipas tij, administrata dhe konsumatorët në përgjithësi kanë qenë të ndrojtur për të nisur pushimet e tyre dhe vihet re rënie e kërkesave për qira dhe blerje apartamentesh. Nëse një vit më parë, fluksi i turistëve nisi që në muajin qershor, këtë vit vihet re që fluksi ka filluar nga data 10 korrik dhe në vazhdim.

 

Kush interesohet

Por tani që zgjedhjet kanë përfunduar, interesi ka nisur të shfaqet.

“Shohim që ka interesim në rritje nga të huajt dhe kryesisht janë nga Gjermania, Polonia, Anglia, Norvegjia, Suedia. Ndër to është edhe një pjesë e mirë e shtetasve kosovarë që jetojnë prej vitesh në këto shtete dhe kanë fuqi të mëdha blerjeje. Ka interes edhe nga kosovarë që jetojnë në Kosovë, por shumë më të limituar”, thotë z. Danushi.

Agjentët vërejnë se para se të investojnë në blerjen e një apartamenti të dytë, të huajt përllogarisin se sa do të mund të fitonin në vit nga dhënia me qira e tij. Nëse kjo përllogaritje rezulton me një shifër më të lartë se interesat bankare, atëherë ata investojnë.

“Por në analizën tonë duhet të theksojmë se Vlora është një mundësi shumë e mirë investimi për shtëpi, sepse bregdeti është shumë i bukur dhe potencialet e zhvillimit për të ardhmen janë shumë të mira”, thotë Akil Danushi.

Emigrantët shqiptarë, nga ana tjetër, më së shumti ata që janë kthyer nga Greqia, kërkojnë kryesisht apartamentet me qira dhe dyqane për të hapur aktivitete. Ata kërkojnë që paratë që kanë mbledhur t’i investojnë në një biznes nga ku edhe mund të sigurojnë jetesën.

“Vihet re se ka edhe shtetas italianë që kanë interes në rritje për të investuar në Vlorë, për të transferuar bizneset nga Italia për t’i sjellë në Shqipëri, për shkak të taksave më të ulëta”.

 

Çmimet, rënie të lehtë

Çmimet, nga ana tjetër, shfaqen në të njëjtin nivel me një vit më parë, me një rënie të lehtë.

Nëse një vit më parë, çmimet luhateshin nga 550-700 euro/m² tani në bregdet mund të gjesh edhe në 500 euro/m², çmim që vlen për rreshtin e dytë ose të tretë.

Rreshti i parë ndërkohë luhatet në kufijtë e 650-800 euro/m². Çmime shumë më të larta kanë ndërtimet e luksit që janë në nivelet e 1300-1500 euro/m² dhe këto vlejnë kryesisht për komplekset luksoze që ofrojnë shumë facilitete dhe mundësi për banorët, që nga pishinat, ambientet e gjelbra, etj. Këto apartamente janë blerë kryesisht nga sipërmarrës vendas dhe të huaj.

Sipas agjentëve, në qytet, apartamente të pashituara janë kryesisht në pak zona, aty ku çmimet janë të shtrenjta. Kryesisht zona e Kalasë dhe e Radhimës ka edhe më shumë apartamente të pashitura, për shkak të çmimeve të larta.

“Në analizën tonë, çmimet në Vlorë janë të mira dhe me interes për të investuar. Çmimet do të rriten në vitet në vazhdim dhe ky është një moment i mirë për të blerë”, këshillon agjenti Akil Danushi.

Sipas tij, janë të shumtë në numër të huajt që kanë ardhur fillimisht për pushime në Vlorë dhe më pas janë kthyer vitin e dytë dhe kanë blerë një apartament në këtë qytet.

Ai është optimist edhe më shumë për trendin e së ardhmes në kushtet kur kryeministri i ri, Edi Rama, është deputet i kësaj zone, dhe pritet që vëmendja ndaj saj të rritet të ndjeshëm. “Nëse në Vlorë do të ketë përmirësim të infrastrukturës dhe problemeve të tjera që ajo ka sot, ne jemi të bindur se ecuria e turizmit dhe si pasojë edhe e tregut imobilar, do të jetë shumë pozitive”, thotë z. Danushi.

 

LEZHA

Çmimi minimal-400 euro/m²

Çmimi maksimal-1000 euro/m²Zona me çmime më të ulëta: Lezhë, qytet Skela, Orikum

Zona me çmime më të larta: Shëngjini

 

Shëngjin, shitjet “mbahen”

Në zonën e Lezhës, shitjet janë fokusuar vetëm në qytetin e Shëngjinit, i cili ka edhe një vijë të gjatë dhe të bukur bregdetare.

Alfons Lacaj, agjent imobilar në Lezhë, i cili drejton zyrën imobilare “Century 21 Vllaznimi”, thotë se tregu imobilar është përqendruar më së shumti te kosovarët që po tregojnë interes për të blerë një apartament në Shëngjin.

“Vendasit kanë shumë pak interes. Ata që kanë kërkesë janë kosovarët dhe kryesisht ata që jetojnë në shtetet europiane, në Gjermani e Zvicër, të cilët kanë edhe fuqi më të madhe blerëse”, thotë z. Lacaj.

Sipas të dhënave nga agjencia, në Shëngjin janë ndërtuar 25 pallate deri në 10 kate dhe po vijohet të ndërtohet edhe më shumë.

Një potencial shumë të mirë zonës po i jep përmirësimi i ndjeshëm i infrastrukturës që ka thithur shumë turistë, vendas dhe të huaj.

“Shëtitorja e re prej 2 kilometrash i ka rritur vlerën ndërtesave rreth e rrotull, pasi ofron një infrastrukturë moderne dhe bashkëkohore dhe ka arkitekturë shumë moderne.

Në analizën tonë, Shëngjini ka shumë perspektivë sepse është një zonë që ofron një panoramë të këndshme që nga plazhi duke shkuar deri tek Laguna, e cila është gjithashtu një potencial shumë i madh për zonën.

Vitin e fundit, vihet re edhe një interesim i turistëve nga Tirana që po vjen për shkak të përmirësimit të plazheve dhe infrastrukturës”, thotë z. Lacaj.

Çmimet në Shëngjin luhaten në kufijtë e 550-1050 euro/m², por ka edhe apartamente që shiten deri në 1250 euro/m².

Shumë më pesimiste është situata në Lezhë, ku mund të blesh edhe me 450 euro/m², ndërkohë që çmimi minimal kanë qenë 580 euro/m².

Interesi dhe kërkesa në Lezhë është në rënie pikiatë dhe sot mund të jenë 50-100 apartamente. Sot ky qytet numëron 40 mijë banorë, gati i dhjetëfishuar në raport me 20 vite më parë. Megjithëse ka një numër në rritje të të ardhurve nga zonat periferike në qytet, fuqia e ulët blerëse e ka limituar shumë sektorin imobilar në qytet.

Njoftimet që do të krahasohen

    Nuk ka prona per tu krahasuar
    The account with the email address already exists on the site. To synchronize with Social Network Login plugin please enter the password to your account on the site.
    Anëtaresohu
    Përdoruesi
    Fjalëkalimi
    Keni harruar fjalëkalimin? Më kujto