Shtëpia e Ismail Kadaresë kushtoi 300 mijë USD, hilet teknike në restaurimin me tulla e beton në vend të gurit e drurit

18.03.2016

Restaurimi apo rikonstruksion është pyetja që ka nisur të bëhet mes gjirokastritëve rreth punimeve në shtëpinë muze të shkrimtarit të njohur, Ismail Kadare. Shtëpia e gurtë u inagurua në fund të muajit janar me rastin e 80 vjetorit të shkrimtarit, i cili mungoi në ceremoninë përuruese pasi ndodhet në Paris. Në pamje të parë gjithçka dukej kthim në kohë, kur disa gra të qytetit kishin punuar me dorë perdet, e më pas i vendosën në dritaret karakteristike të ndërtimeve të këtij qyteti historik. Pasi ndërtesa u dogj dy dekada më parë, “punimet për shtëpinë u zvarritën aq shumë sa edhe shkrimtari humbi durimin, dhe u ndie i trishtuar”, u shpreh për mediat botuesi i veprave të tij, Bujar Hudhri. Ndërkaq, specialistë të restaurimit kanë treguar për revistën “Story” detaje teknike të punimeve, ku mësohet se nuk janë respektuar rregullat teorike të një monumenti historik të kategorisë së parë, siç është kjo ndërtesë. Restaurimi ka kushtuar 300 mijë USD, dhe vlen për t’u cilësuar se është punuar me beton e tulla, gjë që s’lejohet në monumente të klasit A. Puna është se betoni nuk duket nga jashtë, por është në strukturë, gjë që nuk lejohet aspak pasi në objektet e trashëgimisë dhe restaurimit ku duhen përdorur gur dhe dru (materiale autentike) dhe jo tulla e beton, materiale të epokës urbane. Sipas specialistëve që kanë qenë prezentë gjatë punimeve, shkallët dhe dyshemeja janë prej betoni dhe sipër është vendosur shtresë druri. Ndërsa vizitorët e parë janë shprehur se nuk u jep ndjesinë e një shtëpie tradicionale gjirokastrite si pasojë e këtyre zgjidhjeve restauruese që përmendëm më sipër. “Në një zonë historike gjithmonë ruhet autenticiteti me përdorimin e materialeve tradicionale sipas traditës së ndërtimeve, pra jo tulla dhe beton e mbuluar me suva ose dru”, shprehen në konfidencë specialistët. Shtëpia muze që do të jetë e hapur për vizitorët që janë kureshtarë të shohin ku ka jetuar Kadare 17 vitet e para të jetës, ka pesë dhoma, ambiente poshtë ku ruheshin zairetë, si dhe depozita e ujit që mbushej me ujë shiu. Kjo shtëpi, që Kadare ia vuri në dispozicion bashkisë së qytetit 20 vite më parë konsiderohet simbolika e jetës dhe e krijimtarisë së shkrimtarit. Kadare e ka përshkruar shtëpine e gurtë në disa vepra të tij, aq sa çdo lexues ka krijuar përfyrimin personal njësoj sikur të ketë qenë brenda saj. /story.al
Enter your report
Shkruaji një mesazh *
Kyçu
Përdoruesi
Fjalëkalimi
Keni harruar fjalëkalimin? Më kujto